Selena Gomez ka habitur fansat duke zbuluar ëmbëlsirën që dëshiron të shërbehet në dasmën e saj me producentin Benny Blanco dhe nuk është aspak tradicionale.
“Ëmbëlsira ime e preferuar do të ishte biskota me salcë gravy,” tha Gomez në një video të postuar në llogarinë zyrtare të markës së saj Rare Beauty në TikTok. “Biskotat me salcë të gjyshes time për mua janë si ëmbëlsirë.”
33-vjeçarja shtoi se nuk dëshiron një tortë të madhe për ditën e saj të veçantë, por një të vogël, që ajo dhe Blanco, 37 vjeç, mund ta ruajnë në ngrirje për kujtim.
Çifti nisi të përflitej për një lidhje që në korrik të vitit 2023, kur Blanco mori pjesë në festën e ditëlindjes së 31-të të Gomez. Ata e konfirmuan lidhjen e tyre në dhjetor 2023, duke zbuluar se kishin qenë bashkë për gjashtë muaj në fshehtësi. Një vit më vonë, më 11 dhjetor 2024, ata shpallën fejesën.
Sipas Daily Mail, ceremonia e dasmës do të mbahet në shtator në Montecito, Kaliforni, dhe do të zgjasë dy ditë, me pjesëmarrjen e miqve të afërt të çiftit, përfshirë Taylor Swift dhe të dashurin e saj, Travis Kelce.
Për shkak të profilit të lartë të të ftuarve, çifti thuhet se ka shtuar masat e sigurisë. Një burim për Daily Mail tha se Gomez po mendon madje të ndalojë përdorimin e telefonave gjatë dasmës për të ruajtur privatësinë dhe për t’i lejuar të ftuarit të jenë më të pranishëm.
Blanco, nga ana tjetër, ka premtuar një dasmë “të qetë dhe të mrekullueshme”, siç e përshkroi vetë në një episod të podcast-it Therapuss.
“Përgjithmonë nis tani,” shkroi Gomez në një nga postimet e saj në Instagram, ku shfaqet e përqafuar me të fejuarin.
