Jori Delli ka ndarë me ndjekësit e saj në Instagram një nga përjetimet më të vështira personale të ditëve të fundit.
Ajo ka treguar se gjatë qëndrimit për disa ditë në Shqipëri, babai i saj ka pësuar një infarkt, duke i tronditur të gjithë familjarët.
“Babai im u sëmur shumë rëndë dhe pësoi një infarkt. Fatmirësisht, vëllai im ishte pranë tij dhe arriti ta çonte në kohë në spital”, ka shkruar Delli.
Megjithatë, modelja nuk e fshehu zhgënjimin për kujdesin e marrë në spitalin e Vlorës, të cilin e cilësoi si të pamjaftueshëm. Sipas saj, trajtimi nuk ishte në nivelin e duhur për një rast kaq emergjent.
Historia mori një kthesë më të mirë kur babai i saj u transferua në QSUT në Tiranë, ku sipas Delli-t mori ndihmën e specializuar që i shpëtoi jetën.
“Kam vetëm fjalë mirënjohjeje për stafin, infermierët dhe mjekët e QSUT. Falë tyre, babai im sot është gjallë”, tha ajo me emocione.
Në përfundim të mesazhit të saj, Jori bëri edhe një thirrje publike për investime më të mëdha në sektorin e shëndetësisë në Shqipëri, duke theksuar se raste të tilla tregojnë qartë nevojën për standarde më të larta dhe kushte më të mira për pacientët.
