Këngëtari i njohur shqiptar, Florian Carkanji, i njohur me emrin artistik ‘Kelly’, ka ndarë me ndjekësit e tij një lajm të ndjeshëm, duke shpjeguar arsyen e mungesës së tij nga skena dhe ekranet gjatë muajve të fundit.
Përmes një postimi prekës në rrjetet sociale, artisti ka treguar se është duke kaluar një periudhë të vështirë shëndetësore, pasi është prekur nga një paralizë faciale. Kjo gjendje ka ndikuar jo vetëm në pamjen e tij, por edhe në kordat zanore, duke e detyruar të largohet përkohësisht nga muzika.
“Sot dua të ndaj me ju një lajm jo fort të mirë… Shkëputja ime nga koncertet dhe ekrani nuk ka qenë rastësi. Prej disa kohësh po përballem me një paralizë faciale që më ka ndalur gjysmën e fytyrës dhe qafës, duke prekur kështu edhe kordat zanore,” – shkruan Kelly.
Artisti pranon se përballja me një sfidë të tillë nuk është e lehtë, por thekson se po gjen forcë falë mbështetjes së mjekëve, besimit tek Zoti, dashurisë së familjes dhe përkrahjes së fansave.
Megjithëse e vështirë, kjo periudhë nuk e ka thyer shpirtin e tij artistik. Përkundrazi, ai premton rikthim të afërt në skenë, duke dhënë një mesazh shprese për të gjithë ata që e ndjekin:
“Muzika mbetet forca ime dhe shumë shpejt do jem pranë jush.”
