Bashkëshortja e aktorit legjendar Bruce Willis, Emma Heming, ka reaguar ndaj kritikave që mori pasi zbuloi se aktori, i cili po përballet me demencë frontotemporale (FTD), jeton në një shtëpi të veçantë nga ajo dhe vajzat e tyre.
“Opinione ka plot, shumë të zhurmshme… por kush nuk e ka kaluar këtë eksperiencë, nuk ka as të drejtë fjale, as të drejtë vote,” – tha Heming në një video në Instagram, duke iu referuar reagimeve pas intervistës së saj tek Diane Sawyer.
Ajo shtoi se kujdestarët shpesh gjykohen rëndë nga të tjerët:
“Ky është realiteti i kujdestarëve gjykimi, kritika, vështirësitë. Por unë flas hapur, sepse kjo krijon lidhje me ata që e kuptojnë këtë rrugëtim.”
Emma Heming theksoi se vendimi për ta vendosur Bruce-in në një shtëpi tjetër ishte i vështirë, por i domosdoshëm për vajzat e tyre, Mabel (13) dhe Evelyn (11).
“Bruce do ta donte që vajzat të kishin një shtëpi të përshtatur sipas nevojave të tyre, jo të tijave,” – u shpreh ajo.
Pavarësisht kësaj, Heming tha se vizitat janë të shpeshta: “Shkojmë për mëngjes, darkë, dhe Bruce ka një ekip kujdestarësh pranë vetes.”
Në komente, edhe vajza e Bruce, Tallulah (nga martesa me Demi Moore), e mbështeti njerkën duke i shkruar:
“E duam shumë. Faleminderit për gjithçka që bën për ne dhe për babin.”
Bruce Willis, i cili u tërhoq nga aktrimi në vitin 2022 pas diagnozës, u konfirmua një vit më vonë me FTD, një sëmundje që prek gjuhën, lëvizjen dhe sjelljen.
Në një postim të mëparshëm, Heming kishte rrëfyer se çdo përvjetor martesash tani sjell “dhimbje dhe mall” më shumë sesa gëzim, por se dashuria e pakushtëzuar e Bruce-it e mban të fortë.
