Në rolet e saj të fundit televizive, Carla Signoris është gjetur shpesh të interpretojë gra që lënë pas një martesë të shkatërruar. Vetë aktorja e lidh këtë me një “fizik për atë lloj personazhi”, por shton me humor se gjithmonë bëhet fjalë për gra që nuk mposhten nga tradhtia, por gjejnë forcën të ringrihen.

Në serinë Balene – Amiche per sempre, që po transmetohet në Rai1, Signoris luan Millën, një grua 60-vjeçare që pas një zhgënjimi të madh martesor, vendos t’i japë vetes një shans të dytë falë miqësisë dhe dashurisë. «Jam e lumtur që kemi zgjedhur ta trajtojmë temën e të gjashtëdhjetave me lehtësi – thotë ajo – nuk jemi të parat, por shpresojmë të mos jemi as të fundit».

«Tradhtia falet vetëm nëse ia vlen»
Në jetë, ashtu si në rol, Signoris është e qartë mbi çështjen e tradhtisë: «Vetëm nëse raporti ka qenë i fortë, ndoshta ia vlen të bësh një përpjekje për të kuptuar dhe për të ecur përpara. Nëse lidhja ka qenë e dobët që më parë, atëherë përgjigjen e ke marrë dhe është më mirë ta mbyllësh aty».

Nga ëndrra për Miss Univers tek psikiatria
E pyetur për ëndrrat e saj të fëmijërisë, aktorja tregon se donte të bëhej “ose Miss Univers, ose astrofizikane”. Sot, me humor, thotë se do t’i pëlqente të ishte psikiatre: «Më pëlqen shumë të dëgjoj. Jam një shpatull ku të tjerët mund të mbështeten».

Marrëdhënia me kohën dhe me veten
Për moshën, rrudhat dhe pasqyrën, Signoris është e qetë: «Ka ditë që më duket vetja fantastike dhe ditë që them: çfarë shkoi keq? Por kështu është jeta, plot ulje-ngritje».

Si bijë e vetme, thotë se ka vuajtur më shumë kur prindërit u plakën: «Atëherë do të doja të kisha një vëlla ose motër për të më ndihmuar». Vetë është bërë nënë e dy fëmijëve dhe është krenare për ta: «Jam një nënë që pothuajse nuk thotë kurrë jo, sepse fëmijët e mi nuk më kërkojnë gjëra të pamundura. Kemi qenë me fat».

Mbiemri dhe trashëgimia familjare
Fëmijët e saj mbajnë dy mbiemra – Crozza Signoris – një zgjedhje që ajo dhe bashkëshorti, komiku i njohur Maurizio Crozza, bënë rreth 25 vjet më parë: «Unë jam e fundit e familjes Signoris. Babai më pati shumë vonë dhe nuk kishte kush t’i vazhdonte mbiemrin. Do të doja që edhe Mauri të quhej Signoris, sepse zakonisht gruaja merr mbiemrin e burrit dhe asnjëherë e kundërta».

Pa frikë nga vetmia, por me ndjeshmëri ndaj tjetrit
Signoris pranon se gjithmonë ka pasur frikë nga braktisja, që fëmijë kur shihte prindërit të grindeshin. «Nuk më pëlqen fjala fund», thotë ajo, por sot e shijon vetminë kur ajo është një zgjedhje, jo një detyrim.

«Nuk dua të flas për gjithçka, vetëm për gjërat që kanë rëndësi»
Edhe pse shpesh mediat përqendrohen tek fakti që është gruaja e Crozzës, aktorja thotë se kjo e mërzit, por nuk e pengon. Për opinionet, zgjedh të flasë vetëm për çështje thelbësore: «Për shembull, Gaza. Besoj se është e rëndësishme të marrësh një qëndrim, edhe nëse duket si një pikë uji në det. Brezat e ardhshëm do të na pyesin ku ishim».