Matcha ka fituar popullaritet për energjinë qetësuese, fuqinë antioksidante dhe lattet e saj “Instagram-worthy”, por a mund të jetë edhe një aleat sekret kundër humbjes së flokëve? Ndërsa provat klinike ende po mbledhin të dhëna, ekspertët thonë se ka arsye premtuese për të besuar se konsumimi i matcha-s mund të mbështesë flokë më të fortë dhe më të shëndetshëm.
Dr. Ross Kopelman, një kirurg i njohur i transplantit të flokëve në Kopelman Hair Restoration, dhe Jennifer Pallian, dietologe e regjistruar me specializim në ushqyerjen dhe shëndetin e flokëve, kanë zbuluar se çfarë thotë shkenca për këtë lidhje.

Të dy ekspertët theksojnë një përbërës të veçantë në matcha: epigallocatechin gallate (EGCG). Ky antioksidant i katekinave është pika ku fillon gjithë hype-i për flokët.
“Nga këndvështrimi im si kirurg flokësh, përbërësi më interesant në matcha është EGCG,” thotë Dr. Kopelman. “Studimet laboratorike tregojnë se EGCG nxit fazën e rritjes (anagen) të folikulave dhe i mbron nga stresi oksidativ, një nga shkaktarët e miniaturizimit të folikulave në humbjen e flokëve me model.”

Pallian shton se EGCG vepron në shumë nivele:
“EGCG stimulon proliferimin e qelizave të dermal papilla, përforcon mbrojtjen antioksidante dhe aktivizon gjene që nxisin mbijetesën dhe rritjen e folikulave. Më e rëndësishmja, EGCG është një inhibitor natyral i 5α-reduktazës, enzima që konverton testosteronin në dihidrotestosteron (DHT), një shkaktar kryesor i alopecisë androgenetike.”

Stresi është një shkaktar i njohur i rënies së papritur të flokëve ose përkeqësimit të gjendjeve kronike. Këtu hyn një tjetër përbërës i matcha-s, L-theanine.
“E shoh stresin si një shkaktar kryesor të rënies së flokëve tek pacientët e mi,” shpjegon Dr. Kopelman. “Matcha përmban L-theanine, që promovon relaksimin dhe ul nivelin e kortizolit, dhe kjo qetësi mund të ndihmojë indirekt në stabilizimin e ciklit të flokëve.”

Pallian thekson rëndësinë biologjike të kësaj lidhjeje:
“Stresi kronik mund të mbajë qelizat staminale të folikulave në gjendje pushimi, të prishë mjedisin folikular dhe të nxisë inflamacionin. Theanine dhe EGCG së bashku ndihmojnë në neutralizimin e këtyre përgjigjeve ndaj stresit, duke ulur rrezikun e humbjes së flokëve të shkaktuar nga stresi.”
Stresi oksidativ dhe inflamacioni janë tani të njohur si faktorë kryesorë në hollimin e flokëve. Fuqia anti-inflamatore e EGCG mund ta bëjë matcha-n një mbrojtës natyral të skalpit.
“Inflamacioni kronik i skalpit mund të përshpejtojë miniaturizimin e folikulave,” shpjegon Dr. Kopelman. “Antioksidantët në matcha mund të luajnë një rol mbrojtës duke zbutur këtë proces inflamator.”

Pallian shton:
“Inflamacioni gjendet në deri 71% të mostrave të biopsive të skalpit të njerëzve me humbje flokësh me model. EGCG jo vetëm që ul DHT-në, por gjithashtu bllokon sinjalet pro-inflamatore si IL-6 dhe TGF-β2, të cilat aktivizohen nga DHT-ja. Ky efekt i dyfishtë është veçanërisht i rëndësishëm.”
Problemi është se, megjithëse studimet laboratorike duken premtuese, provat tek njerëzit janë ende të kufizuara.
“Ende nuk kam parë studime klinike të cilësisë së lartë që lidhin direkt konsumimin e përditshëm të matcha-s me ndryshime të matshme në dendësinë ose trashësinë e flokëve,” thotë Dr. Kopelman. “Shumica e të dhënave janë preklinikë, duke parë EGCG në kultura qelizash ose modele shtazore.”

Pallian thekson se ekzistojnë dëshmi indirekte:
“Pilot-triali Forti5 testoi një suplement me ekstrakt të çajit jeshil dhe gjeti përmirësime të rëndësishme në rritjen e flokëve gjatë 24 javëve. Por pasi matcha nuk është studiuar e vetme, dëshmia mbetet indirekte.”

A duhet të filloni të pini matcha për rritjen e flokëve?

Të dy ekspertët bien dakord: matcha nuk është një kurë magjike, por mund të jetë një shtesë e dobishme për rutinën e shëndetit të flokëve.
“Nuk e shoh matcha-n si zëvendësim për trajtime të provuara si finasteride ose minoxidil, por mund të jetë një përforcues mbështetës, i përshtatshëm për stilin e jetesës,” thotë Dr. Kopelman.
Pallian e sheh si një fitore holistike:
“Me kombinimin e EGCG, theanine dhe aminoacideve, matcha mbështet mjedisin e folikulave dhe reziliencën ndaj stresit, dy faktorë që kanë rëndësi për shëndetin afatgjatë të flokëve.”