Në familjen më të famshme të reality TV-t, edhe bisedat në WhatsApp janë bërë lajm. Në episodin e fundit të “The Kardashians”, Kourtney Kardashian pranoi se është larguar nga grupi i familjes Kardashian-Jenner, për shkak të motrës së saj, Khloé Kardashian, që sipas saj “nuk ndalonte së foluri keq për të gjithë”.
“Thjesht nuk munda ta kontrolloja veten,” – tha 46-vjeçarja gjatë një bisede me mikun e saj Simon Huck. “Khloé filloi të analizonte një postim në rrjete sociale, dhe unë thashë: ‘Seriozisht? Kjo s’është ajo për të cilën kemi kohë. Lërini njerëzit të jetojnë jetën e tyre.’”
Kourtney sqaroi në një rrëfim se është përpjekur të kufizojë komunikimin me njerëzit që i sjellin energji negative.
“Unë dua të shpërndaj vetëm dritë dhe dashuri. Kur dikush më jep arsye të largohem nga një bisedë, e marr si shenjë për ta bërë,” – tha ajo.
Në anën tjetër, Khloé u kundërpërgjigj në mënyrën e saj të zakonshme të drejtpërdrejtë:
“Kush bën një koment dhe pastaj del nga grupi? Kaq qesharake,” – tha ajo në një rrëfim të veçantë, duke e quajtur motrën e madhe “të mjerë” dhe duke shtuar se “ajo po projekton” pakënaqësitë e veta.
“Dëshiron të thuash se unë jam negative? Jo. Ti je e pakënaqur me jetën tënde, dhe po e shfryn mbi mua. Unë jam shumë e lumtur, shumë pozitive, jetoj një jetë të bukur. Dhe po, mund të më lësh rehat.”
Në një klip paraprak për episodin e ardhshëm, motrat përballen ballë për ballë për “dramat e grupit familjar”.
