Festat kanë marrë një kuptim krejt tjetër për familjen e përzier Willis, teksa Bruce Willis po përballet me demencën frontotemporale (FTD) dhe afazinë progresive primare (PPA).

“Duhet të mësosh, të përshtatesh dhe të krijosh kujtime të reja, por duke mbajtur gjallë të njëjtat tradita që kishe më parë,” ka thënë bashkëshortja e aktorit, Emma Heming Willis, për revistën People gjatë konferencës End Well 2025, duke shtuar se “jeta vazhdon”.

Edhe pse Heming, 47 vjeçe, e pranon se “demenca është e vështirë”, ajo këmbëngul se brenda kësaj lufte ka ende dritë:
“Besoj se është e rëndësishme të mos e pikturojmë gjithçka rreth demencës vetëm në ngjyra të errëta. Ne ende qeshim. Ka ende gëzim. Thjesht duket ndryshe.”

Ajo nuk ka zbuluar detaje për planet e familjes për Ditën e Falënderimeve, por ka dhënë një sinjal për organizimet e Krishtlindjeve:

“Bruce e ka dashur gjithmonë Krishtlindjen, dhe ne e adhurojmë ta festojmë bashkë me të,” është shprehur Heming, duke shtuar me humor për filmin e tij më të famshëm: “Mendoj se është e rëndësishme ta vëmë ‘Die Hard’, sepse është film i Krishtlindjeve.”

Sa i përket përditshmërisë, Emma e cila me Bruce ka dy vajza, Mabel (13) dhe Evelyn (11) tregon se jeta e tyre është “shumë e thjeshtë” dhe “në fakt ka qenë gjithmonë e tillë”, duke theksuar se fokusi kryesor është “të jemi të pranishëm me të”.

Së fundmi, edhe vajza e Bruce-it, Rumer Willis, ka folur hapur në rrjete sociale, duke treguar se ndihet “shumë e lumtur dhe mirënjohëse” që ende “mund ta përqafojë” të atin. Ajo ka thënë se, “pavarësisht nëse ai më njeh apo jo”, beson se ai “e njeh dashurinë” dhe se ajo këtë dashuri e ndien fort në kthim.

Edhe pse Bruce nuk është më i njëjti baba që ajo ka njohur dikur, Rumer, 37 vjeçe, thotë se ende sheh “shkëndijën e tij”, gjë që “të bën të ndihesh mirë”. Ajo është mirënjohëse edhe për faktin që mund ta çojë pranë tij vajzën e saj 2-vjeçare, Louetta, që të kalojë kohë me gjyshin.

Bruce Willis ka edhe tre vajza të tjera nga martesa e parë me Demi Moore: Rumer, Scout dhe Tallulah.

Familja Willis njoftoi në mars 2022 se aktori po vuante nga afazia dhe se, për këtë arsye, do t’i jepte fund karrierës së tij shumëvjeçare në aktrim. Një vit më vonë, ata bënë publik edhe diagnostikimin me demencë frontotemporale.