Disa prerje flokësh nuk dalin kurrë nga moda. Një prej tyre është prerja në stilin Farrah Fawcett, që sot njihet nga TikTok-u dhe sallonet si “butterfly cut”. Supermodelja Bella Hadid është emri më i fundit që i bashkohet këtij rikthimi retro dhe, si zakonisht, e bën të duket si prerja më e bukur në qarkullim.
Bella u shfaq në Texas, në pop-up-in “Orebella Ornament Shop”, një hapësirë e përkohshme e dedikuar linjës së saj të parfumeve Orebella. Krah të dashurit të saj cowboy, Adan Banuelos, ajo prezantoi look-un e ri: flokë të gjatë, voluminozë, me shtresa të lira që hapen rreth fytyrës si krahë fluture.
Edhe pse “butterfly cut” duket sikur është bërë pa shumë mundim, në të vërtetë kërkon dorë të saktë. Siç kanë shpjeguar hairstylist-ët që punojnë me yjet, sekreti është tek kornizimi i fytyrës: shtresat e shkurtra krijohen përpara, rreth mollëzave dhe nofullës, ndërsa pas kokës shkojnë gradualisht më të gjata. Baza pritet me brisk për të shtuar teksturë dhe për të shmangur vijat e drejta dhe të rënda. Rezultati është një lëvizje “shattered”, shumë e lehtë dhe femërore, që i jep flokut jetë në çdo kënd.
Në dy vitet e fundit, variacionet e kësaj prerjeje kanë dominuar tapetin e kuq dhe Instagram-in: nga versionet shumë të gjata, deri te bob-et që prekin mjekrën. Selena Gomez, Jenna Ortega dhe motra e Bellës, Gigi Hadid, e kanë provuar tashmë trendin, secila në mënyrën e vet. Bella thjesht e konfirmon se “butterfly cut” është bërë tashmë klasik i ri.
Në një sezon ku flokët e rregullt, me lëvizje natyrale dhe shtresa të buta janë kthyer në obsesion global, prerja e re e Bella Hadid thotë vetëm një gjë: kur gjen kombinimin e duhur mes volumit, shtresave dhe stilit personal, retro nuk është kurrë thjesht e së kaluarës është e tashme dhe, shumë shpesh, e ardhmja.
