Të hash një copë të mirë parmigiano në tavolinën e zyrës mund të duket pak e çuditshme në pamje të parë. Por nëse e sheh si një snack të pasur me proteina dhe pa listën e gjatë të përbërësve ultra–të përpunuar që ka një protein bar klasike, papritur nuk tingëllon më aq keq.

Biokimistja franceze Jessie Inchauspé, e njohur në rrjete si Glucose Goddess, thotë se ha deri në 1 kg parmigiano në javë dhe e mban në çantë si “emergjencë proteine” sa herë e merr uria. Kjo ka hapur pyetjen: a është në të vërtetë parmigiano një burim i nënvlerësuar proteinash?

Sa proteina ka vërtet parmigiano?
Nutricionistët thonë se po, është një burim i mirë proteinash dhe shumë më “natyral” se shumica e pluhurave të proteinës. Përveç proteinës, jep edhe kalcium dhe nuk ka sheqer, ëmbëlsues apo emulgatorë të shtuar.

Në shifra: për të marrë rreth 25–30 g proteina vetëm nga parmigiano, duhet të hash afërsisht 80 g djathë (një copë sa pëllëmba e dorës). Kjo sasi sjell rreth 330–400 kalori, 20–30 g yndyrë dhe pothuajse aspak karbohidrate. Për kë është në dietë keto apo low–carb, kjo tingëllon mjaft tërheqëse.

Por ka edhe një “kundërpeshë”: e njëjta sasi përmban rreth 12–16 g yndyrë të ngopur. Për gratë, rekomandimi ditor është 20 g yndyrë të ngopur, për burrat 30 g. Pra me një copë të madhe parmigiano je shumë afër kufirit ditor (sidomos nëse gjatë ditës konsumon edhe gjalpë, mish të kuq apo djathëra të tjerë).

Po ashtu, parmigiano është edhe i pasur me natrium (kripë). Konsumi i tepërt i yndyrave të ngopura dhe kripës lidhet me rritjen e rrezikut për sëmundje të zemrës dhe qarkullimit.

A është parmigiano proteinë “e plotë”?
Po. Ashtu si mishi apo peshku, parmigiano përmban të nëntë aminoacidet esenciale, ato që trupi nuk mund t’i prodhojë vetë. Kjo e bën një proteinë të plotë dhe të vlefshme për masë muskulore dhe rikuperim.

Për dikë që kërkon të ulë produktet ultra–të përpunuara, një copë parmigiano mund të jetë pjesë e një strategjie të mençur proteinash por si pjesë e mozaikut, jo si burimi kryesor i vetëm. Kombinoje me burime më “të lehta”: peshk i bardhë, pulë, kos grek, bishtajore, tofu etj.

Përveç parmigiano-s, ka plot opsione të tjera të pasura me proteina dhe relativisht të “pasta”:

• Kos grek i trashë ose skyr – rreth 18–20 g proteina në 200 g
• Djathë cottage – rreth 25 g proteina në 220–230 g
• Tempeh – afërsisht 20 g proteina në 100 g
• Edamame (sojë e freskët) – rreth 11 g proteina në 100 g të zier
• Pasta nga thjerrëza, qiqra ose edamame – shumë më tepër proteina se pasta e zakonshme
• Farat e kërpit dhe farat e kungullit – të lehta për t’i hedhur mbi sallata, kos ose supa për një “boost” proteine