Një tjetër kapitull tensioni po hapet rreth Big Brother VIP Kosova, pasi Linda Rei dha një intervistë me tone të ashpra në emisionin “Më prit të dielën”, ku akuzoi produksionin dhe producenten Olsa Muhameti për shkelje kontrate, mospagesë dhe madje marrje të sendeve personale.
Në deklaratat e saj, Linda mohoi kategorikisht pretendimet se ndaj saj ekziston një padi, duke këmbëngulur se, sipas saj, ishte produksioni që e theu kontratën i pari. Ajo u shpreh se ka vite eksperiencë në televizion dhe “i di si funksionojnë këto gjëra”.
Sipas Lindës, pagesa ishte e përcaktuar qartë në kontratë dhe duhej të kryhej në mënyrë javore, por kjo siç pretendon ajo nuk ka ndodhur. Në rrëfimin e saj, ajo tregon se situata i ka rënduar psikologjikisht, duke përmendur lodhje ekstreme dhe presion emocional gjatë asaj periudhe.
Akuza më e rëndë lidhet me pretendimin se, përveç mospagesës, i janë marrë edhe sende personale (duke përmendur artikuj si këpucë, valixhe dhe extensions). Linda e artikuloi këtë si “vjedhje”, duke e kthyer historinë nga një konflikt kontraktual në një debat publik shumë më të nxehtë.
