Një intervistë e vjetër e Nicola Peltz për marrëdhënien me familjen Beckham po qarkullon sërish në rrjet, në një kohë kur përplasja mes Brooklyn Beckham dhe prindërve të tij është kthyer në një nga temat më të komentuara të ditëve të fundit.

Intervista, e dhënë në shkurt të vitit 2024 gjatë promovimit të filmit “Lola”, ku Peltz ishte regjisore, skenariste dhe protagoniste, e tregon aktoren në një tjetër ton: të qetë, mirënjohëse dhe shumë pozitive ndaj vjehrrit dhe vjehrrës së saj, David dhe Victoria Beckham. Në atë dalje televizive, ajo u pyet për raportin me familjen e bashkëshortit dhe u shpreh se ndihej “shumë me fat” që mund të kalonte kohë me ta.

“Vij nga një familje e madhe ku jemi shumë të lidhur dhe tani kam një familje edhe më të madhe. Brooklyn është rritur shumë afër me familjen e tij. Kështu që, për ne, fakti që mund të kalojmë kohë të gjithë bashkë, më bën të ndihem shumë me fat,” tha Peltz në atë periudhë, kur ajo dhe Brooklyn kishin dy vjet të martuar.

Ajo shkoi edhe më tej, duke i quajtur David dhe Victoria “njerëzit më të mrekullueshëm në botë”, ndërsa u ndal veçanërisht te mbështetja që kishte marrë nga Victoria. Sipas saj, prania e stilistes në premierën e “Lola”-s kishte qenë shumë domethënëse. “Fakti që Victoria udhëtoi për të më mbështetur do të thotë shumë për mua. Vërtet,” u shpreh ajo.

Këto deklarata po lexohen sot me një sy tjetër, sepse vijnë në kontrast të fortë me akuzat e publikuara më pas nga Brooklyn Beckham, i cili në një reagim të gjatë në rrjetet sociale deklaroi se nuk dëshiron pajtim me familjen. Në atë mesazh, ai pretendoi se prindërit kanë qenë për vite të tëra “kontrollues” dhe se kanë ndikuar në mënyrën si është treguar historia e familjes në media, ndërsa përmendi edhe tensione që, sipas tij, lidhen drejtpërdrejt me Nicola Peltz.

Brooklyn ngriti disa pretendime të forta, duke thënë se nëna e tij ka tentuar “pa pushim” të dëmtojë marrëdhënien e tij me Nicola dhe përmendi edhe episode që, sipas tij, e kanë bërë të ndihet i poshtëruar, përfshirë një moment të bujshëm në dasmën e vitit 2022. Ai po ashtu deklaroi se kishte pasur përplasje edhe me vëllezërit, Romeo dhe Cruz, duke thënë se e kishin sulmuar në rrjet dhe më pas e kishin bllokuar.

Në të njëjtën kohë, Nicola dhe Brooklyn janë parë në publik në disa dalje të fundit, ndërsa David dhe Victoria kanë vazhduar angazhimet e tyre, përfshirë paraqitje në evente të rëndësishme në Paris gjatë javëve të modës.

Rikthimi i intervistës së vitit 2024 ka shtuar edhe më shumë kuriozitetin e publikut, sepse sjell një “foto” krejt tjetër të raporteve brenda familjes, përpara se konflikti të dilte hapur. Për momentin, as David dhe as Victoria nuk kanë reaguar publikisht ndaj pretendimeve të Brooklyn, ndërsa historia vazhdon të zhvillohet mes deklaratave, aludimeve dhe interpretimit që i bën rrjeti çdo detaji që del në dritë.