Një studim i kompanisë irlandeze të sigurimeve të udhëtimit JustCover ka zgjedhur Lisbonën si qytetin më shumëngjyrësh në botë. Më shumë se 2.6 milionë ngjyra u identifikuan në fotografitë e analizuara të kryeqytetit portugez.
Lisabona konsiderohet qyteti më shumëngjyrësh në botë, sipas një studimi të ri të realizuar nga specialistët irlandezë të sigurimeve të udhëtimit, JustCover. Analiza u bazua në imazhe të 78 destinacioneve të njohura për ngjyrat e tyre plot gjallëri.
Në një kohë kur udhëtimet dokumentohen gjithnjë e më shumë në rrjetet sociale, estetika dhe ndikimi vizual janë kthyer në faktorë të rëndësishëm në zgjedhjen e një destinacioni pushimi, të paktën për ata që pëlqejnë të bëjnë fotografi dhe të krijojnë përmbajtje. Sipas studimit të JustCover, më shumë se 2.6 milionë ngjyra u identifikuan në regjistrimet vizuale të Lisbonës.
Kryeqyteti portugez njihet për ndërtesat me tonalitete pastel dhe pllakat dekorative që mbulojnë lagjet historike si Alfama, si edhe për tramvajet e verdhë që lëvizin përgjatë rrugicave të ngushta.
Kuala Lumpur, në Malajzi, renditet në vendin e dytë, me një kontrast të theksuar ngjyrash mes qiellgërvishësve modernë dhe ndërtesave tradicionale, përfshirë tempuj dhe faltore të zbukuruara. Shkallët shumëngjyrëshe në Batu Caves lidhen shpesh me këtë destinacion dhe, ndonëse nuk ndodhen brenda qytetit, janë vetëm pak minuta larg me makinë.
Qyteti i Portos renditet i treti, duke forcuar praninë e Portugalisë në këtë listë. Ashtu si në Lisbonë, çatitë me ngjyrë të kuqërremtë dhe shtëpitë karakteristike shumëngjyrëshe përgjatë lumit Douro kontribuojnë në këtë vlerësim. Rrugët me kalldrëm dhe bodrumet historike të verës u japin vizitorëve një përvojë autentike të jetës portugeze dhe të ngjyrave të qytetit.
Në vendin e katërt renditet qyteti-port Cartagena, në Kolumbi, i njohur për ngjyrat e tij të larmishme. Një nga monumentet e tij është Kulla e Sahatit me ngjyrë të verdhë, që ndodhet në hyrjen kryesore të qytetit të vjetër. Përgjatë rrugëve, ndërtesat me ngjyra të ylberta dhe ballkonet e mbushura me lule shtojnë edhe më shumë ngjyra në qytet.
Rio de Janeiro, në Brazil, renditet i pesti mes qyteteve më shumëngjyrëshe, me më shumë se 2.3 milionë ngjyra unike të identifikuara në imazhet e peizazheve dhe ndërtesave të tij. Shkallët Selarón, të mbuluara me pllaka në ngjyrë të verdhë, blu dhe jeshile, janë një nga atraksionet më emblematike të qytetit, duke tërhequr miliona turistë çdo vit.
Mes 15 qyteteve më shumëngjyrëshe, në kontinentin amerikan dallohen gjithashtu Guanajuato, Havana, New Orleans, Antigua dhe New York. Kjo falë arkitekturës dhe rrugëve plot lëvizje, të mbushura me tabela dhe ndriçim neon.
Edhe Europa është mirë e përfaqësuar në renditje, me Dubrovnikun dhe Barcelonën, krahas Lisbonës dhe Portos, që zënë pozicione të rëndësishme. / Euronews
