Brooklyn Beckham raportohet se është paguar të paktën 1 milion dollarë për reklamën e tij të re për DoorDash, në të cilën ironizon konfliktin e vazhdueshëm me familjen. Por ndërsa kompania e konsideron fushatën argëtuese dhe të suksesshme, burime pranë familjes Beckham thonë se prindërit dhe të afërmit e tij janë thellësisht të lënduar.
Djali i madh i David dhe Victoria Beckham u përball me një valë kritikash në rrjetet sociale pas publikimit të reklamës, në të cilën lë të kuptohet se do ta ndjekë Kupën e Botës 2026 nga shtëpia për të shmangur familjen e tij, ndërsa biletat vendos t’ia dhurojë dikujt tjetër.
“Me siguri po pyesni veten pse po e shoh Kupën e Botës FIFA 2026 nga shtëpia. Nuk është se nuk kam bileta”, thotë Brooklyn në reklamë. “Është sepse… është një histori e gjatë.”
Në versionin e plotë të spotit, 27-vjeçari ia dorëzon biletat një korrieri të DoorDash, duke i thënë: “Këto mund t’i marrë dikush tjetër. Vendosi diku ku ka më shumë argëtim.”
Reklama u publikua vetëm pak ditë pasi motra e tij 14-vjeçare, Harper Beckham, u fotografua duke shkuar e vetme në shtëpinë e Brooklyn dhe bashkëshortes së tij, Nicola Peltz, në Beverly Hills, në një përpjekje të raportuar për t’u afruar me të.
Harper u largua vetëm disa minuta më vonë, pasi Brooklyn nuk ndodhej në shtëpi. Në atë kohë, ai ishte në New York, ku merrte pjesë në një panel në Festivalin Tribeca për markën e tij të salcës pikante, Cloud23.
