5 zakone të përditshme të grave që janë të lumtura në punë

Është e lehtë të mendosh se gratë që duken më të lumtura në punë thjesht kanë gjetur vendin perfekt të punës. Por sipas ekspertëve të karrierës dhe psikologëve të punës, një punë e përsosur nuk ekziston. Ajo që i dallon këto gra është se kanë krijuar disa zakone të vogla të përditshme që mbrojnë mirëqenien e tyre, u japin më shumë kontroll mbi punën dhe nuk lejojnë që puna të pushtojë gjithë jetën e tyre.

Edhe puna më e mirë ka kolegë të vështirë, detyra monotone dhe ditë kur nuk ke aspak dëshirë të hapësh kompjuterin. Diferenca nuk qëndron te puna, por te mënyra se si njerëzit e përjetojnë atë.

Ja pesë zakonet që, sipas ekspertëve, kanë gratë që e duan vërtet punën e tyre:

1. E shohin frustrimin si një sinjal, jo si dështim

Në vend që ta injorojnë pakënaqësinë, ato përpiqen të kuptojnë se çfarë po u tregon. Ndoshta po marrin më shumë përgjegjësi sesa duhet, po vendosin gjithmonë nevojat e të tjerëve përpara të tyret ose po pranojnë kërkesa që u marrin gjithë energjinë.

2. E përshtatin vazhdimisht punën sipas vetes

Ato nuk e shohin përshkrimin e punës si diçka të pandryshueshme. Përpiqen të shtojnë aktivitetet që u japin kënaqësi dhe kuptim, si prezantimet, mentorimi ose projektet që i motivojnë më shumë. Po aq rëndësi u japin edhe marrëdhënieve me kolegët, duke investuar te bashkëpunimet që janë mbështetëse dhe pozitive.

3. Festojnë edhe sukseset e vogla

Në vend që të presin vetëm promovime apo rritje page për t'u ndjerë të suksesshme, ato vlerësojnë edhe arritjet e përditshme, si zgjidhja e një problemi, ndihma ndaj një kolegu apo përfundimi me sukses i një detyre të vështirë. Kjo i ndihmon të ruajnë motivimin dhe vetëbesimin.

4. E organizojnë punën sipas energjisë së tyre

Gratë që e shijojnë punën e dinë kur janë më produktive. Detyrat që kërkojnë më shumë përqendrim i bëjnë në orët kur ndihen më energjike, ndërsa punët rutinë i lënë për momentet kur energjia bie. Ato shmangin kalimin vazhdimisht nga një detyrë në tjetrën, pasi kjo ul përqendrimin dhe rrit lodhjen mendore.

5. E mbyllin ditën e punës me një ritual

Para se të largohen nga puna, ato shkruajnë detyrat për ditën tjetër ose lënë shënime për veten. Kjo u lejon ta lënë punën në zyrë dhe të mos vazhdojnë të mendojnë për të gjatë gjithë mbrëmjes. Ekspertët theksojnë se rikuperimi nuk është e kundërta e produktivitetit, por një pjesë thelbësore e tij.