Aktorja Blake Lively ka hedhur akuza të reja ndaj aktorit Justin Baldoni, duke e akuzuar atë dhe ekipin e tij ligjor se kanë zbuluar detaje nga dëshmia e saj e 31 korrikut dhe po përpiqen të krijojnë një narrativë të rreme në media.
Sipas dokumenteve të siguruara nga Page Six, avokatët e Lively paraqitën një kërkesë zyrtare në gjykatë të hënën, ku pretendojnë se Baldoni dhe bashkëpaditësit e tij “rrjedhën menjëherë detaje të dëshmisë te tabloidët”, duke përfshirë TMZ dhe Daily Mail. Qëllimi, sipas tyre, ishte “të krijonin një spektakël mediatik” dhe të paraqisnin se takimi i tyre ishte një përballje ballë për ballë dramatike.
Në media u raportua se Lively kishte mbërritur në dëshmi e shoqëruar nga motra e saj Robyn Lively, bashkëshorti Ryan Reynolds dhe tetë avokatë ndërkohë që, sipas artikujve, Baldoni ishte i vetëm me avokatin e tij. Por dokumentet ligjore tregojnë ndryshe: Lively dëshmoi përballë Baldonit dhe katër të tjerëve që ishin të pranishëm në sallë, përfshirë edhe tetë avokatë nga palët e Baldonit.
Avokatët e aktores e konsiderojnë këtë përpjekje si manipulim të opinionit publik, duke theksuar se Baldoni dhe përfaqësuesi i tij, Bryan Freedman, janë përpjekur ta shndërrojnë këtë rast serioz në një shfaqje mediatike. Në të kaluarën, ekipi i Lively ka pohuar madje se Freedman ka sugjeruar shitjen e biletave për një dëshmi të filmuar në Madison Square Garden, siç deklaroi një përfaqësues i aktores për revistën People.
“Kjo është një çështje serioze e ngacmimit seksual dhe hakmarrjes, dhe meriton të trajtohet si e tillë”, u shpreh zëdhënësi i Lively.
Blake Lively (37) po padit Baldonin (41) për ngacmim seksual gjatë xhirimeve të filmit “It Ends With Us”, si dhe ka ngritur akuza ndaj agjentëve të tij të PR për një fushatë shpifjesh ndaj saj. Një pjesë e padive të saj u rrëzuan muajin e kaluar, përfshirë pretendimet ndaj specialistit të PR-së, Jed Wallace.
Nga ana tjetër, Baldoni i ka mohuar akuzat dhe ka kundërpaditur Blake Lively dhe bashkëshortin e saj, Ryan Reynolds, për shpifje dhe shantazh. Megjithatë, padia e tij me vlerë 400 milionë dollarë u hodh poshtë nga gjykata në qershor.
Deri më tani, Baldoni dhe përfaqësuesit e tij nuk kanë komentuar mbi kërkesën e fundit ligjore të paraqitur nga Lively.
Çështja vazhdon të jetë në fokusin e mediave, jo vetëm për natyrën e ndjeshme të akuzave, por edhe për ndikimin që po ka në opinionin publik dhe industrinë e filmit.
