Sipas The Sun, dy ish-anëtarë të One Direction, Zayn Malik dhe Louis Tomlinson, kanë nënshkruar një marrëveshje multimilionëshe me Netflix për të realizuar një dokumentar rrugëtimi në SHBA. Projekti pritet të përfshijë kujtime nga periudha e bandës dhe reflektime për jetën dhe humbjen e Liam Payne.
Dokumentari, që tashmë ka nisur xhirimet, pritet të publikohet vitin e ardhshëm dhe konsiderohet si një ndër projektet më të mëdha muzikore të platformës.
Burime pranë produksionit thanë:
“Ky do të jetë një spektakël i jashtëzakonshëm për Netflix dhe do të ndezë emocionet e ushtrisë globale të fansave të One Direction. Po ashtu, do të jetë një shans për reflektim të thellë mbi udhëtimin e jashtëzakonshëm që grupi ka kaluar që nga krijimi i tyre në ‘The X Factor’ 15 vite më parë.”
One Direction u krijua në vitin 2010 dhe përbëhej nga Zayn Malik, Louis Tomlinson, Liam Payne, Harry Styles dhe Niall Horan. Grupi pushoi aktivitetin në vitin 2016, ndërsa Malik ishte larguar një vit më herët.
Liam Payne ndërroi jetë tragjikisht në tetor 2024, në moshën 31-vjeçare, pas një rënieje fatale nga hoteli ku qëndronte në Buenos Aires. Analizat toksikologjike zbuluan se ai kishte konsumuar kokainë, crack dhe benzodiazepinë. Katër anëtarët e mbetur u ribashkuan në funeralin e tij në Britani.
Përpara vdekjes së Payne, të pestë anëtarët kishin nisur bisedime për një ribashkim në një koncert të fundit.
