Fansat e Taylor Swift po besojnë se kënga e saj më e fundit, “Actually Romantic”, është një thumbim ndaj Kim Kardashian, falë një vargu që duket se i referohet drejtpërdrejt asaj.
Në vargun e dytë të këngës nga albumi rekord “The Life of a Showgirl”, Swift këndon:
“Por ti vazhdon të më dërgosh valentinët qesharakë / Dhe e di që mendon se dukesh e keqe / Por në fakt je e ëmbël, e adhurueshme.”
Fansat kujtuan menjëherë momentin e vitit 2018, kur Kardashian dërgoi dhurata për Shën Valentinin “armiqve” të saj, dhe publikoi listën në Instagram ku përfshihej edhe vetë Taylor Swift.
“Vendosa që këtë Shën Valentin ta festoj me të gjithë me miqtë, dashuritë, dhe po, edhe me ‘hater’-at e mi,” kishte shkruar atëherë Kim.
Ndërkohë, disa “Swifties” të tjerë besojnë se kënga mund të jetë një diss ndaj Charli XCX, si përgjigje për këngën e saj të vitit 2024 “Everything is Romantic.”
Megjithatë, nëse referenca për “valentinët qesharakë” ka të bëjë me Kim Kardashian, kjo s’do ishte hera e parë që Swift i kushton një këngë ish-rivalës së saj.
Në albumin e vitit 2024 “The Tortured Poets Department”, ajo publikoi këngën “thanK you aIMee”, ku fjalët e mëdha në titull formojnë emrin KIM, dhe ku këndon për një “vajzë me ngjyrë bronzi e spërkatur me sprej” që e ka bullizuar.
