Victoria Beckham s’e kishte menduar kurrë veten në minus, por në vitet e para të krijimit të markës së saj të modës, gjërat nuk shkuan siç kishte imagjinuar.
Ish-anëtarja e Spice Girls pranon se mungesa e përvojës në menaxhimin e një biznesi e futi atë dhe bashkëshortin e saj, David Beckham, në borxhe të mëdha.
“Ne ishim dhjetëra milionë në humbje,” – rrëfen Victoria në serialin dokumentar.
“Po, shkoja në shtëpi tek burri im, por edhe tek partneri im i biznesit. Flisnim për këtë gjë, duhej ta bënim, sepse ai ishte i përfshirë financiarisht. Dhe e urreja. E urreja absolutisht.”
David, me të cilin është e martuar prej më shumë se 25 vitesh, kujton sa e vështirë ishte ajo periudhë:
“U ulëm dhe pamë sa shumë kishte investuar. Më theu zemrën, sepse Victoria është një grua krenare. Kur u njohëm, ajo ishte më e pasur se unë, madje ajo bleu shtëpinë tonë të parë në Hertfordshire, të quajtur ‘Beckingham Palace’.”
Ai shton:
“Kur më tha: ‘Na duhen edhe disa para, biznesi ka nevojë për ndihmë,’ ishte e vështirë për të dy. Sepse as unë nuk kisha më mundësi të vazhdoja kështu. Në një moment i thashë: ‘Kjo s’mund të vazhdojë më.’”
Për Victoria-n, ndjesia ishte sikur “i gjithë sistemi po shembej”. Ajo kuptoi se i duhej investim i jashtëm për të mos humbur gjithçka që kishte ndërtuar.
Në retrospektivë, Beckham pranon se në fillim kishte shpenzime të tepërta dhe mungesë kontrolli:
“Kishim shpenzime të çmendura, si për shembull dërgimi i karrigeve me avion nga njëra anë e botës në tjetrën. Kur e mendoj tani, më duket e pabesueshme por unë e lejova të ndodhte. Mendoj se pjesë e problemit ishte që njerëzit kishin frikë të më thoshin ‘jo’.”
Megjithatë, falë mbështetjes së David-it dhe përkushtimit të saj, Victoria arriti të ristrukturojë markën dhe ta shndërrojë në një biznes fitimprurës.
