Justin Baldoni e bën të qartë se beteja e tij ligjore kundër Blake Lively nuk ka përfunduar.
Pavarësisht mbylljes së fundit të kundërpadisë, avokati i tij, Bryan Freedman, i tha Page Six se Baldoni dhe ekipi i Wayfarer Studios zgjodhën me vetëdije të mos paraqesin një ankesë të ndryshuar.
“Nuk janë humbur afate,” thekson Freedman. “Klientët tanë vendosën të mos e ndryshojnë padinë për të ruajtur të drejtat e apelimit.”
Aktualisht, nuk është e qartë nëse Baldoni ose Wayfarer Studios planifikojnë realisht të bëjnë apel.
“Ndërkohë, ne po fokusohemi te pretendimet e zonjës Lively,” shton Freedman, duke theksuar se ai dhe ekipi i tij “mbeten plotësisht të përkushtuar për ta ndjekur të vërtetën në çdo rrugë ligjore dhe faktike të mundshme.”
Ai e mbyll duke theksuar se ata “presin me padurim ditën e tyre në gjykatë.”
Javën e kaluar, gjyqtari i Gjykatës së Qarkut të SHBA, Lewis Liman i cili mbikëqyr çështjen dha një vendim përfundimtar duke deklaruar se Baldoni dhe bashkëpaditësit e tij kishin refuzuar të paraqisnin një ankesë të ndryshuar në kundërpadinë e tyre për shpifje dhe shantazh me vlerë 400 milionë dollarë kundër Lively-t dhe bashkëshortit të saj, Ryan Reynolds.
Liman tha se i kishte kontaktuar të gjitha palët në mesin e tetorit për t’i paralajmëruar se do të jepte një vendim përfundimtar për të mbyllur çështjen, duke vënë në dukje se e vetmja që u përgjigj ishte Lively.
Aktorja, 38 vjeçe, kërkoi që kërkesa e saj për rimbursim të tarifave ligjore të mbetej në fuqi, kërkesë që Liman e pranoi.
Kundërpadia e Baldonit e janarit si edhe padia e tij për shpifje prej 250 milionë dollarësh kundër New York Times u hodhën poshtë fillimisht në qershor.
Në atë kohë, Liman vendosi se Baldoni, 41 vjeç, dhe bashkëpaditësit e tij “nuk kanë pretenduar që Lively është përgjegjëse për ndonjë deklaratë tjetër përveç atyre në ankesën e saj pranë [California Civil Rights Department], të cilat janë të privilegjuara.”
Lively akuzoi për herë të parë kolegun dhe regjisori e “It Ends With Us” për ngacmim seksual dhe hakmarrje në dhjetor 2024, duke e paditur zyrtarisht më vonë po atë muaj. New York Times raportoi i pari për pretendimet e saj.
Liman shpjegoi se kundërpadia e Baldonit “pretendonte se Reynolds dhe [publicistja Leslie] Sloane bënë deklarata shtesë që akuzonin Baldonin për sjellje seksuale të pahijshme dhe se Times bëri deklarata shtesë që akuzonin palët e Wayfarer se po zhvillonin një fushatë njollosjeje.”
Megjithatë, vazhdoi Liman, “Palët e Wayfarer nuk kanë pretenduar që Reynolds, Sloane ose Times do ta kishin vënë seriozisht në dyshim vërtetësinë e këtyre deklaratave bazuar në informacionin që kishin në dispozicion, siç kërkohet që të jenë të përgjegjshëm për shpifje sipas ligjit në fuqi.”
Baldoni ka mohuar vazhdimisht akuzat e Lively-t ndaj tij, dhe çështja e saj pritet të gjykohet në mars 2026.
