David dhe Victoria Beckham kanë hedhur poshtë pretendimet e djalit të tyre, Brooklyn, se vizita e papritur e motrës së tij më të vogël, Harper, në shtëpinë e tij në Los Angeles ishte e inskenuar, sipas një raportimi të ri.
Një burim pranë familjes e hodhi poshtë deklaratën e mëparshme të përfaqësuesit të Brooklyn, duke i thënë “The Sun” se ajo ishte “qartazi e pakuptimtë”, në një artikull të publikuar të dielën.
Motra 14-vjeçare e Brooklyn u pa duke vizituar shtëpinë e vëllait të saj në Los Angeles, ku ai jeton me bashkëshorten Nicola Peltz, pak pasi kishte festuar yllin që babai i saj mori në Hollywood Walk of Fame.
Por, për fat të keq, përpjekja e saj nuk dha rezultat, pasi burime thanë për Page Six se Harper u largua nga prona pothuajse menjëherë pasi kishte mbërritur, pa arritur ta takonte Brooklyn.
Burimi shtoi se Brooklyn dhe bashkëshortja e tij nuk ishin të disponueshëm. Më pas, Brooklyn ndau në Instagram Stories se në momentin e vizitës së së motrës ndodhej në New York.
Megjithatë, një përfaqësues i çiftit i tha Page Six: “Fakti që fotografët ishin aty në momentin kur letra u dorëzua personalisht, i thotë të gjitha. Kjo ishte e koreografuar për kamerat.”
Vizita e Harper vjen disa muaj pasi shefi 27-vjeçar deklaroi se nuk “dëshiron të pajtohet me familjen” në një deklaratë të fortë në rrjetet sociale, ku pretendonte se e ëma kishte ndërhyrë në kërcimin e tij të parë me Nicola në dasmën e tyre të vitit 2022 dhe se kishte “kontrolluar narrativat në media” për familjen e famshme.
“Nuk jam duke u kontrolluar, po ngrihem për veten time për herë të parë në jetën time,” tha ai në atë kohë.
“Gjatë gjithë jetës sime, prindërit e mi kanë kontrolluar narrativat në media për familjen tonë, përmes postimeve performative në rrjete sociale, eventeve familjare dhe marrëdhënieve joautentike. Së fundmi, kam parë me sytë e mi deri ku janë të gatshëm të shkojnë për të vendosur gënjeshtra të panumërta në media, kryesisht në kurriz të njerëzve të pafajshëm, vetëm për të ruajtur fasadën e tyre.”
Duke marrë parasysh deklaratën e Brooklyn, nuk është surprizë që ai refuzoi të merrte pjesë edhe në ceremoninë e babait të tij në Hollywood Walk of Fame.
Në fakt, një burim i tha Page Six në fillim të këtij muaji se pjesëmarrja e tij nuk kishte qenë kurrë realisht në diskutim.
“Edhe nëse ai do të donte t’i shihte në ceremoninë e Walk of Fame, Nicola nuk do ta priste aspak mirë këtë,” tha burimi për Page Six.
Një tjetër burim shtoi: “Dy gjëra mund të jenë të vërteta njëkohësisht; Nicola mund të jetë e vështirë dhe Brooklyn mund të mos dëshirojë t’i shohë prindërit e tij.”
