Me trendet e pafundme të kujdesit për lëkurën që qarkullojnë në rrjetet sociale, shpesh është e vështirë të dallosh se çfarë ia vlen vërtet dhe çfarë është thjesht një modë kalimtare. Kur pastrimi i dyfishtë i fytyrës (double cleansing) filloi të bëhej popullor, shumë njerëz e konsideruan të panevojshëm dhe përsëritës. Megjithatë, kjo metodë ekziston prej vitesh dhe mund të ketë një ndikim real në shëndetin e lëkurës.
Pastrimi i dyfishtë e ka origjinën në rutinat japoneze dhe koreane të kujdesit për lëkurën, ku përdoren si pastrues me bazë vaji, ashtu edhe pastrues me bazë uji. Kjo metodë u bë edhe më e njohur falë rutinës së famshme koreane me 10 hapa.
Dermatologia Dr. Sarah Hogan shpjegon gjithçka që duhet të dini rreth kësaj metode.
Çfarë është pastrimi i dyfishtë?
Siç e tregon edhe emri, pastrimi i dyfishtë nënkupton larjen e fytyrës në dy hapa. Fillimisht përdoret një pastrues me bazë vaji dhe më pas një pastrues me bazë uji. Qëllimi është që këto dy produkte të punojnë së bashku për të larguar papastërtitë, yndyrën, mbetjet e grimit dhe kremit mbrojtës nga dielli, duke e lënë lëkurën më të pastër.
A duhet ta bëni çdo ditë?
Pastrimi i dyfishtë ndihmon në pastrimin e thellë të lëkurës dhe largimin e djersës, papastërtive, kremit kundër diellit dhe grimit që grumbullohen gjatë ditës. Kjo mund të ndihmojë në uljen e bllokimit të poreve dhe shfaqjes së puçrrave. Mund ta praktikoni çdo ditë, veçanërisht në ditët kur keni përdorur grim ose keni kaluar shumë kohë jashtë.
Kush duhet ta bëjë?
Ashtu si çdo hap tjetër në kujdesin e lëkurës, edhe pastrimi i dyfishtë nuk funksionon njësoj për të gjithë. Sipas Dr. Hogan, personat që vuajnë nga ekzema, rosacea ose kanë lëkurë shumë të ndjeshme mund ta përjetojnë këtë metodë si tepër tharëse dhe irrituese.
Gjithashtu, pastrimi i dyfishtë rekomandohet të bëhet vetëm në mbrëmje, pasi synon të largojë grimin dhe papastërtitë e grumbulluara gjatë ditës. Nga ana tjetër, njerëzit me lëkurë të yndyrshme mund të përfitojnë shumë nga kjo metodë, pasi ajo ndihmon në largimin e yndyrës së tepërt dhe sebumit.
Si të bëni pastrim të dyfishtë?
1. Lani duart
Para se të prekni fytyrën, sigurohuni që duart të jenë të pastra për të shmangur transferimin e baktereve në lëkurë.
2. Filloni me fytyrë të thatë
Meqenëse hapi i parë përfshin një pastrues me bazë vaji, fytyra duhet të jetë plotësisht e thatë.
3. Përdorni pastruesin me bazë vaji
Masazhojeni produktin në fytyrë dhe më pas shpëlajeni me ujë.
4. Vazhdoni me pastruesin me bazë uji
Pasi të keni larguar pastruesin e parë, aplikoni pastruesin me bazë uji dhe pastroni sërish fytyrën. Dermatologia paralajmëron se shumë persona mendojnë se po bëjnë pastrim të dyfishtë, por përdorin dy produkte me bazë vaji, gjë që mund të shkaktojë probleme të lëkurës.
5. Thajeni fytyrën me kujdes
Pasi të keni përfunduar të dy hapat, thajeni fytyrën lehtë me një peshqir të pastër. Mos e fërkoni fortë lëkurën dhe sigurohuni që peshqiri të jetë i pastër, përndryshe mund të riktheni bakteret në fytyrë.
