Turneu promovues i filmit “Spider-Man: Brand New Day”, i cili pritet të dalë në kinema më 29 korrik, vijon me një tjetër ndalesë të rëndësishme. Pas Madridit, Amsterdamit dhe Berlinit, protagonistët Zendaya dhe Tom Holland mbërritën në Romë.
Dy aktorët, të cilët sipas raportimeve janë martuar së fundmi në fshehtësi, mbërritën në kryeqytetin italian mbrëmjen e 22 qershorit. Roma nuk është një destinacion i panjohur për çiftin, pasi ata e kanë vizituar edhe më parë për pushime romantike.
Zendaya ndau në Instagram disa momente nga mbrëmja e saj e parë në qytet. Në fotografitë e publikuara, aktorja shfaqej me një veshje që sillte ndër mend kostumin e Spider-Man. Galeria përfundonte me një imazh të rrallë privat: një selfie ku Tom Holland shihej duke e puthur në pjesën e pasme të qafës.
Mbrëmjen e 23 qershorit, Zendaya dhe Tom bënë hyrjen e tyre në tapetin e kuq përpara Castel Sant’Angelo, i ndriçuar me ngjyrat e kuqe dhe blu dhe i dekoruar me logon e filmit dhe rrjetat ikonike të Spider-Man.
Ata u pritën nga një turmë entuziaste, ku shumë fansa mbanin maska të superheroit. Dy aktorët ecën përgjatë Ponte Sant’Angelo, ndërsa në fasadën e monumentit projektoheshin pamje nga filmi i drejtuar nga Destin Daniel Cretton.
Edhe këtë herë, ashtu si në ndalesat e mëparshme të turneut, çifti nuk i kurseu gjestet e vogla të dashurisë. Përqafimet, duart e ndërthurura dhe shikimet plot mirëkuptim treguan edhe një herë afërsinë e tyre.
Kimia që Zendaya dhe Tom Holland shfaqin në tapetin e kuq buron nga një marrëdhënie që zgjat prej afro një dekade. Ata u njohën në vitin 2016, gjatë xhirimeve të filmit “Spider-Man: Homecoming”.
Thashethemet e para për një romancë mes tyre nisën të qarkullonin në vitin 2017, gjatë promovimit të filmit, por të dy i mohuan kategorikisht në atë kohë.
Marrëdhënia e tyre u bë publike vetëm në vitin 2021, kur Holland i kushtoi Zendaya-s një urim të ëmbël për 25-vjetorin e lindjes. Krahas një fotografie nga prapaskenat e xhirimeve, ai shkroi: “MJ-ja ime, të uroj ditëlindjen më të lumtur. Më telefono kur të zgjohesh.”
Që prej atij momenti, Zendaya dhe Tom janë përpjekur ta mbajnë marrëdhënien sa më larg vëmendjes publike. Daljet e tyre të përbashkëta kanë qenë të rralla, ashtu si edhe deklaratat për ndjenjat që i lidhin.
Në nëntor të vitit 2021, pasi u publikuan disa fotografi ku ai shihej duke puthur Zendaya-n, Holland foli hapur për rëndësinë që ka privatësia për të.
“Një nga anët negative të famës sonë është se privatësia nuk është më nën kontrollin tonë, por gjithmonë kam qenë i vendosur ta mbaj jetën time private”, deklaroi ai.
Zendaya ndan të njëjtën filozofi. Madje, edhe hapi më i rëndësishëm në jetën e tyre si çift, martesa, duket se është realizuar në fshehtësi të plotë.
Pas muajsh spekulimesh, Tom Holland dukej se e konfirmoi martesën pothuajse rastësisht gjatë një interviste për “Esquire UK”.
Biseda nisi nga disa fotografi të krijuara me inteligjencë artificiale, ku dy aktorët shfaqeshin në një ceremoni të rreme martese në liqenin e Comos. Imazhet u bënë virale dhe arritën të mashtronin edhe gjyshen e Holland, e cila besoi se nuk ishte ftuar në dasmën e nipit.
Kur gazetari e pyeti nëse i ishte dashur t’i qetësonte edhe familjarët e tjerë, aktori u përgjigj pas disa sekondash heshtjeje: “Jo, sepse ata ishin të gjithë të pranishëm.”
Kur intervistuesi tha se nuk e dinte që martesa kishte ndodhur, Holland e mbylli çështjen me fjalët: “Kaq do të them për këtë.”
Në një botë ku pothuajse çdo moment ndahet në kohë reale, Tom Holland dhe Zendaya vazhdojnë ta ruajnë me fanatizëm jetën e tyre private, duke ofruar vetëm herë pas here ndonjë copëz të vogël nga historia e tyre së bashku.
Ndoshta është pikërisht kjo që e bën marrëdhënien e tyre kaq të veçantë.
