Çdo punonjës ka aftësi dhe cilësi që vlerësohen në vendin e punës, por ka edhe sjellje që mund të ndikojnë negativisht në marrëdhëniet me ekipin dhe në zhvillimin profesional.
Themeluesi dhe drejtori ekzekutiv i në kompaninë e pijeve Olipop, Ben Goodwin nuk do t’ju punësojë nëse nuk bindet që jeni realisht të apasionuar pas punës që do të bëni. Për të, mungesa e motivimit është një sinjal i qartë paralajmërues. "Duhet të jenë të motivuar", thotë ai.
Sipas Goodwin, pasioni për punën ka efekt zinxhir, sa më shumë e do atë që bën, aq më shumë e mbron misionin e kompanisë dhe përpiqesh të përmirësohesh, në dobi të vetes dhe të ekipit. "Mes pasionit dhe aftësisë teknike, fiton gjithmonë pasioni. Nëse ke pasion të vërtetë, aftësitë i mëson", thotë ai.
Por ai paralajmëron se pasioni nuk duhet të kalojë në ego. "Nuk mund të punësojmë njerëz që e vendosin egon e tyre mbi misionin e ekipit", thotë ai. Edhe drejtues të tjerë mendojnë njësoj. Ja cilat janë shenja paralajmëruese që përmendin ata:
Mungesa e empatisë dhe bujarisë
Bill Phelps, CEO i zinxhirit amerikan Dave’s Hot Chicken, nuk toleron njerëz “toksikë”. Një punonjës toksik, sipas tij, është ai që nuk ka ndjeshmëri apo bujari, dhe kjo sjellje përhapet te të tjerët.
Ndërkohë, punonjësit që ndihmojnë të tjerët krijojnë lidhje më të forta profesionale dhe kanë më shumë gjasa të ngjiten në karrierë.
"Kur je jashtëzakonisht bujar, gjithçka të kthehet mbrapsht. Bujaria nuk të zbraz xhepat, përkundrazi, i mbush", thotë ai.
Ai shton se, edhe pse nuk gëzohet kur duhet të largojë dikë nga puna, ndonjëherë është e domosdoshme për të ruajtur kulturën e kompanisë. "Nuk jam krenar kur pushoj njerëz, por jam krenar për një kulturë pune të jashtëzakonshme", thotë ai.
Marrja e të gjithë meritës për vete
Një tjetër tipar negativ për Monica Cepak, CEO e kompanisë shëndetësore Wisp, është punonjësi që mendon se mund t’i zgjidhë të gjitha problemet vetëm.
Për ta shmangur këtë gjatë intervistave, ajo pyet kandidatët: "Cili është problemi më i vështirë që ke zgjidhur në punë dhe si arrite te zgjidhja?”
Nëse përgjigjja është: "E bëra gjithçka vetë", Cepak e kupton menjëherë që ai person nuk di të punojë në ekip. "Ne jemi një ekip, dhe aftësia për të bashkëpunuar është thelbësore", thotë ajo.
Kandidatët më të mirë janë ata që përmendin punën e përbashkët dhe pranojnë se janë të gatshëm të kërkojnë ndihmë dhe të bashkëpunojnë me ekipin.
"Do të habiteni se sa shumë njerëz sot përdorin vetëm fjalën 'unë'. Nëse nuk dëgjoj asnjëherë 'ne', kjo është zakonisht një shenjë e keqe", thotë ajo.
