Mijëra njerëz morën pjesë ditën e parë të Strawberry Music Festival në Wuhan të shtunën.

Pjesëmarrësit mund të këndonin, kërcenin dhe argëtoheshin pranë njëri-tjetrit, pas më shumë se një viti nën kushte strikte si pasojë e pandemisë që shpërtheu fillimisht pikërisht aty.

Festivali u kthye në Wuhan pas dy vjetësh, duke qenë se vitin e kaluar u detyrua të ishte online për shkak të kufizimeve të COVID-19.

Një përfaqësues për organizatorët i tha Reuters se numrat ishin të kufizuar këtë vit, duke shtuar se rreth 11,000 njerëz ishin atje të shtunën. Barriera u vendosën përpara çdo skene dhe personeli i sigurisë kufizoi numrat në ato zona. Disa spektatorë kishin maska, por shumë jo.

Njerëzit në Wuhan jetuan më shumë se dy muaj me kufizime të rrepta gjatë bllokimit të parë të shkaktuar nga koronavirusi. Që nga ajo kohë qyteti e mposhti virusin, sipas të dhënave zyrtare. Në muajt e fundit në vend janë raportuar vetëm disa shpërthime sporadike, gjë që ka lehtësuar shumë frikën nga virusi në Kinë.

"Vitin e kaluar ne (në Wuhan) vuajtëm nga koronavirusi", tha një student 23-vjeçar dhe banor i Wuhanit, Gao Yuchen. "Nuk ka qenë e lehtë për të arritur këtu ku jemi sot. Njerëzit këtu kanë bërë përpjekje të mëdha dhe kanë paguar një çmim të madh. Kështu që ndihem shumë i ngazëllyer që jam këtu (në festival)."

Ngjarja 2-ditore bashkon këngëtarë dhe grupe vendase në 3 faza në parkun Garden Expo të Wuhanit. Të pranishmit erdhën në Wuhan nga i gjithë vendi.

Kina raportoi 16 raste të reja me COVID-19 të premten dhe të gjitha rastet ishin infeksione të importuara me origjinë jashtë shtetit. Numri i përgjithshëm i rasteve të konfirmuara COVID-19 në territorin e Kinës është 90,671, ndërsa numri i të vdekurve mbetet i pandryshuar, 4,636, shumë prej të cilëve ishin banorë të Wuhanit.

Kina kreu rreth 11.6 milionë vaksinime kundër COVID-19 të premten, duke e çuar numrin e përgjithshëm e të vaksinuarve në më shumë se 265 milionë, sipas të dhënave të lëshuara nga Komisioni Kombëtar i Shëndetësisë të shtunën.