Temperaturat kanë pësuar një rënie të ndjeshme në zonat verilindore të vendit, duke shënuar fillimin e parë të një panorame tipike dimërore. Një valë e ftohtë ka përfshirë rajonin, duke sjellë reshje shiu dhe dëbore.
Në lartësitë mbi 1000 metra mbi nivelin e detit, bora ka mbuluar fshatra të tëra, si Shishtaveci, Zapoti, Topojani, Gryk-Qaji, Arreni dhe Kalisi. Pamjet e bardha kanë rikthyer atmosferën e dimrit, edhe pse jemi ende në fillim të tetorit.
Sipas informacioneve zyrtare, deri tani nuk janë raportuar probleme në qarkullimin rrugor apo në furnizimet bazë. Megjithatë, autoritetet paralajmërojnë drejtuesit e mjeteve që të tregojnë kujdes gjatë lëvizjes, për shkak të lagështisë dhe rrezikut të formimit të akullit në rrugë.
Kjo është dëbora e parë e sezonit, që vjen si shenjë e hershme e afrimit të dimrit dhe sjell jo vetëm sfida për banorët e zonave të thella, por edhe një bukuri të veçantë natyrore, që çdo vit kthehet në atraksion për vizitorët dhe turistët.
