Dimri nuk është vetëm për batanije dhe çaj të ngrohtë, është edhe koha perfekte për aventura në borë, peizazhe magjepsëse dhe pushime që të mbushin me energji. Nëse po kërkon frymëzim për të organizuar pushimet dimërore, këtu janë disa nga vendet më të bukura dhe të preferuara për këtë stinë.

1. Zermatt, Zvicër

Zermatt është një parajsë për skiatorët dhe dashamirësit e natyrës. E vendosur në hijen e malit madhështor Matterhorn, kjo qytezë zvicerane ofron pista për të gjitha nivelet dhe një atmosferë luksoze, por të qetë. Një nga atraksionet më të veçanta është treni panoramik Gornergrat Bahn, që të ofron pamje të mahnitshme të Alpeve të mbuluara me borë.

2. Hallstatt, Austri

Hallstatt duket sikur ka dalë nga një kartolinë. E rrethuar nga male dhe e vendosur buzë liqenit, kjo qytezë e vogël austriake është perfekte për ata që kërkojnë qetësi, romancë dhe një eksperiencë autentike dimërore. Me rrugicat e ngushta, arkitekturën tradicionale dhe peizazhet e bardha, Hallstatt është një destinacion magjik në çdo kuptim.

3. Rovaniemi, Finlandë / htëpia e Babagjyshit

Për pushime familjare apo për ata që kërkojnë të rizbulojnë fëmijën e brendshëm, Rovaniemi në Lapland është zgjedhja ideale. Këtu ndodhet Shtëpia zyrtare e Babagjyshit, ndërsa mund të përjetosh edhe aktivitete unike si udhëtimi me slita qensh husky, takime me drerët ose vëzhgimi i dritave veriore (Aurora Borealis).

4. Quebec City, Kanada

Quebec City është një nga qytetet më të bukura të Amerikës së Veriut për pushime dimërore. Me rrugët me kalldrëm, kështjellën Château Frontenac dhe atmosferën e një Evrope të vogël, qyteti ofron ngjarje dimërore të mrekullueshme si Carnaval de Québec, një nga festivalet më të mëdha të dimrit në botë.

5. Bansko, Bullgari

Për ata që duan një përzierje të bukurisë natyrore, sporteve dimërore dhe çmimeve të përballueshme, Bansko është një zgjedhje e zgjuar. Ky resort në malin Pirin ofron kushte shumë të mira për ski, një qytet të vjetër me atmosferë mikpritëse dhe kuzhinë tradicionale bullgare që ngroh shpirtin.

6. Harbin, Kinë

Harbin nuk është një destinacion i zakonshëm, por ai të lë pa fjalë. I njohur për Festivalin Ndërkombëtar të Akullit dhe Borës, ky qytet kinez shndërrohet në një galeri të madhe në natyrë me skulptura gjigante prej akulli dhe dritash. Një përvojë unike që ndodh vetëm një herë në vit dhe që të mbetet gjatë në kujtesë.

7. Valbona dhe Thethi, Shqipëri

Për udhëtarët që duan të qëndrojnë më afër, Alpet Shqiptare ofrojnë një dimër të paprekur, me pamje mahnitëse, mikpritje tradicionale dhe qetësi absolute. Valbona dhe Thethi janë destinacione të shkëlqyera për ecje në dëborë, pushime larg zhurmës dhe përjetime të rralla në natyrën shqiptare.