Nëse deri dje magnezi ju dukej një suplement i zakonshëm, ekspertët thonë se është koha ta shihni ndryshe. Ky mineral është një nga elementët më të rëndësishëm për funksionimin e trupit, ndihmon në përmirësimin e gjumit, redukton inflamacionin, forcon muskujt dhe madje ndikon në rigjenerimin e ADN-së. Dhe ushqimi që përmban sasinë më të lartë të tij? Spinaqi.

Pse magnezi është kaq i rëndësishëm
“Magnezi merr pjesë në mbi 300 procese biologjike,” shpjegon nutricionistja Itziar Digón. “Ai ndihmon në tkurrjen dhe relaksimin e muskujve, përfshirë zemrën, përmirëson transmetimin nervor dhe ruan imunitetin aktiv.”
Studimet tregojnë se mungesa e magnezit mund të shkaktojë lodhje, pagjumësi, tension të lartë dhe ndjesi rëndese në muskuj.

Doktoresha Isabel Viña Bas shton se magnezi është “mineral i dytë më i bollshëm në qelizat tona” dhe se prania e tij ndikon drejtpërdrejt në mënyrën si funksionojnë enët e gjakut dhe sistemi nervor.

Një filxhan spinaq të papërpunuar përmban rreth 24 mg magnez, ndërsa kur gatuhet, kjo sasi rritet në 157 mg, pasi trupi e përthith më lehtë pas zierjes.
Nutricionistja Paula Martín Clares e përshkruan spinaqin si një “superushqim për lëkurën, flokët dhe kockat,” pasi përveç magnezit përmban edhe kalcium, hekur, kalium, fosfor, vitaminat A, C, E, K dhe grupin B.

Sipas saj, spinaqi është gjithashtu i ulët në kalori (vetëm 7 për filxhan), plot fibra dhe antioksidantë si luteina dhe zeaksantina që përmirësojnë shikimin, si dhe përbërje që ndihmojnë në qarkullimin e gjakut dhe shëndetin e tretjes.

Ndryshe nga shumë perime të tjera, gatimi nuk e shkatërron magnezin në spinaq, përkundrazi, e bën më të përthithshëm. Digón rekomandon që ta konsumoni të gatuar në mbrëmje, për të ndihmuar tretjen dhe relaksimin para gjumit.

Nëse zgjidhni spinaqin të konservuar apo të ngrirë, kini parasysh dallimet:

-Spinaqi i konservuar ka jetë më të gjatë, por përmban më shumë kripë dhe më pak vitaminë C.
-Spinaqi i ngrirë ruan më shumë vlera ushqyese dhe ka një shije më të freskët kur gatuhet.

Sa spinaq duhet të hamë?
Dietologia Lauren Manaker thotë se nuk ka një sasi fikse mjafton ta përfshini rregullisht në dietë, si pjesë e një game të gjerë perimesh. Megjithatë, ajo paralajmëron se spinaqi përmban oksalate, përbërje që mund të ndikojnë në formimin e gurëve në veshka nëse konsumohet në sasi shumë të mëdha.

Si ta përfshini lehtë në dietë
Në sallata: Kombinojeni me domate qershi, vaj ulliri dhe uthull të bardhë. Shtoni proteina si pulë, turtull ose ton për një vakt të plotë.
Në smoothie: Përzieni me banane, boronica, fara kërpi dhe qumësht bajamesh për një smoothie plot energji.
Në ushqime të ngrohta: Shtoni një grusht spinaq në makarona, omëleta apo supa për më shumë fibra dhe vitamina.

Spinaqi nuk është vetëm “ushqimi i Papait,” por një sekret i mirëfilltë për trupin dhe trurin. Ai përmirëson energjinë, qarkullimin, lëkurën, gjumin dhe gjendjen shpirtërore gjithçka që lidhet me mirëqenien e plotë.

/Përkthyer nga Vogue