Martesa e këngëtares me famë botërore Dua Lipa dhe aktorit Callum Turner ka sjellë emocione jo vetëm për fansat e çiftit, por edhe për komunitetin arbëresh në Itali, i cili ka zgjedhur ta përshëndesë këtë moment me një gjest simbolik plot domethënie.
Në Piana degli Albanesi, e njohur nga arbëreshët si Hora e Arbëreshëve, u organizua një homazh i veçantë për çiftin e sapomartuar. Me këtë rast, Dua Lipa dhe Callum Turner morën si dhuratë vathët tradicionalë arbëreshë “Panieri”, një prej simboleve më të njohura të artizanatit dhe trashëgimisë kulturore të komunitetit.
Punuar tërësisht me dorë nga mjeshtrit argjendarë të Gli Ori di Piana Lucito, vathët përfaqësojnë jo vetëm elegancën e traditës arbëreshe, por edhe lidhjen e fortë që ky komunitet ruan me rrënjët e tij shqiptare prej më shumë se pesë shekujsh.
Ceremonia u shndërrua në një festë të kulturës arbëreshe. Dhjetë vajza të veshura me kostumet tradicionale të zonës interpretuan valle folklorike, duke sjellë para të pranishmëve ngjyrat, historinë dhe identitetin e një prej komuniteteve më të rëndësishme shqiptare jashtë trojeve.
Atmosfera u pasurua më tej nga interpretimet e muzikantit arbëresh Pierpaolo Petta, i cili solli tingujt karakteristikë të muzikës tradicionale të kësaj treve.
Në aktivitet morën pjesë edhe përfaqësues të pushtetit lokal të Piana degli Albanesi, duke e kthyer këtë moment në një shprehje krenarie për komunitetin arbëresh dhe një mundësi për të promovuar kulturën shqiptare në Itali.
Përtej dhuratës simbolike, ceremonia përcolli një mesazh të qartë: trashëgimia arbëreshe vazhdon të jetojë dhe të ruajë lidhjen e saj me identitetin shqiptar, duke zgjedhur ta ndajë këtë krenari edhe në momente të veçanta si martesa e një prej figurave më të njohura shqiptare në botë.
