Mbledhjet e punës janë një mundësi e shkëlqyer për të fituar besimin e drejtuesve. Sipas Melody Wilding, autore e librit Managing Up dhe trajnuese ekzekutive që prej më shumë se 15 vitesh, e cila ka punuar me profesionistë në kompani si Google dhe Amazon, të flasësh në momentin e duhur mund t'ju ndihmojë të fitoni më shumë besim nga drejtuesit, rritje page dhe projekte të rëndësishme.

Megjithatë, jo çdo ndërhyrje në një mbledhje ka të njëjtën vlerë. Mund të flisni vetëm për të mbushur heshtjen, pa thënë asgjë me vlerë, ose edhe më keq, të dukeni të papërgatitur. 

Sipas Melody Wilding, mënyra se si komunikoni në mbledhje mund të ndikojë drejtpërdrejt në mënyrën si ju perceptojnë drejtuesit. Të bëni pyetjet e duhura, të mbështesni idetë me fakte dhe të flisni për rezultatet konkrete janë disa nga mënyrat më efektive për të fituar besueshmëri dhe për të avancuar në karrierë. Më poshtë janë 4 strategji që mund t'ju ndihmojnë:

1. Bëni pyetjen që askush tjetër nuk po e bën

Nuk është e nevojshme të jepni gjithmonë idenë më revolucionare për të rënë në sy. Shpesh, një pyetje e menduar mirë mund të zbulojë një supozim të gabuar, të ngadalësojë një diskutim të nxituar ose ta rikthejë bisedën në drejtimin e duhur.

2. Përdorni në mënyrë të zgjuar mbështetjen e të tjerëve

Njerëzit priren t'u besojnë më shumë ideve kur dinë se edhe të tjerët i mbështesin. Kur prezantoni një propozim, përmendja me takt e kolegëve ose drejtuesve që e mbështesin atë mund ta bëjë argumentin tuaj më bindës. Mund të përdorni shprehje si: "Drejtuesi i produktit ishte në të njëjtën linjë me këtë ide." "Klienti tha se kjo ishte pikërisht ajo që kërkonte."

3. Flisni për atë që ka rëndësi për drejtuesit

Lidheni kontributin tuaj me prioritetet kryesore të kompanisë, si ulja e kostove, rritja e efikasitetit, shpejtësia, menaxhimi i rrezikut apo rritja e biznesit.

4. Flisni për rezultatet me fakte konkrete

Shprehje të përgjithshme si "projekti po ecën mirë" ose "po bëjmë progres" nuk krijojnë shumë përshtypje. Në vend të tyre, përdorni shifra dhe rezultate konkrete si: "Gjatë 90 ditëve të fundit kemi lançuar funksione të reja për më shumë se 10 mijë klientë", ose "Tashmë menaxhoj llogari në pesë rajone të ndryshme."