Kur bëhet fjalë për shëndetin e zorrëve, është folur shumë për ushqimet më të mira që duhet të hamë, si kimchi apo farat chia, por shumë rrallë për atë që duhet të pimë.

Ta nisësh ditën me një pije të fermentuar e të pasur me probiotikë, si kefiri, ose me një çaj jeshil të mbushur me polifenole, është një zgjedhje shumë e mirë. Sigurisht, bashkë me shumë ujë. Por sistemi yt tretës nuk fle kur fle ti. Në fakt, mbrëmja është një moment kyç për shëndetin intestinal, sepse mikrobioma e zorrëve nis punën e saj të rigjenerimit dhe riparimit. Ajo që bëjmë gjatë orës para gjumit ndikon drejtpërdrejt në cilësinë e kësaj pune të brendshme, që ndodh gjatë natës.

Ekziston një çaj bimor shumë i thjeshtë, me vetëm tre përbërës, i rekomanduar nga ekspertët, që mund të ndihmojë në përmirësimin e tretjes, gazrave, fryrjes dhe shëndetit të përgjithshëm të zorrëve.

Pse mbrëmja është një moment kaq i rëndësishëm për zorrët

“Truri ynë e do përsëritjen dhe rutinën, stabilitetin dhe vazhdimësinë,” thotë naturopatja Lydie Palmieri. “Një pije rituale në fund të ditës bëhet një sinjal për trurin: është koha për t’u shkëputur, është koha për të pushuar.”

Sistemi nervor parasimpatik është pjesa e sistemit nervor autonom që kontrollon funksionet e pavullnetshme të trupit. Siç vëren Cleveland Clinic, ai njihet edhe si sistemi i “pushimit dhe tretjes”: momenti kur trupi ruan energjinë, ngadalëson rrahjet e zemrës, aktivizon sistemin imunitar kur organizmi është në qetësi dhe, mbi të gjitha, stimulon tretjen. Kur ky sistem është i qetë, zorra relaksohet dhe trupi është gati të pranojë, të përpunojë dhe të rigjenerohet.

Megjithatë, doktoresha Martine Cotinat, autore e librit “Guide to Gut Health”, vë në dukje një nuancë të rëndësishme. Një pije e konsumuar në të njëjtën kohë me një vakt të vonë mund të rrisë volumin e përmbajtjes në stomak dhe të nxisë refluksin gastro-ezofageal gjatë natës, që ajo e cilëson si “më agresivin”. Nga ana tjetër, hidratimi shumë vonë në mbrëmje rrit mundësinë që të zgjohesh natën për të shkuar në tualet, duke prishur gjumin dhe, paralelisht, duke ndikuar edhe te kapsllëku. Kur bëhet fjalë për zakonet tona të pirjes së ujit, më shumë është më mirë, por është e këshillueshme që pjesa më e madhe të konsumohet më herët gjatë ditës.

Atëherë, cila është zgjedhja e duhur? Një pije e rregullt, miqësore me zorrët, pas darkës, por jo menjëherë para gjumit, në sasi të vogël dhe me temperaturë të vakët. “Si temperaturat e ftohta, ashtu edhe ato shumë të nxehta, e ngadalësojnë tretjen,” thotë doktoresha Cotinat.

Një pije mbrëmjeje miqësore me zorrët: verbena, lule portokalli dhe kopër

Naturopatja Lydie Palmieri e përshkruan këtë pije me tre përbërës si një çaj që “qetëson mendjen dhe barkun”. Ja çfarë përmban dhe pse:

Verbena e limonit

Kjo bimë ka veprim të dyfishtë: qetëson, ul stresin, përmirëson cilësinë e gjumit, nxit tretjen dhe lehtëson fryrjen. Si suplement, verbena e limonit përdoret shpesh nga sportistët për të ulur dhimbjet muskulare pas stërvitjes dhe për të lehtësuar shqetësimet në muskuj dhe kyçe. Mjafton të lësh në ujë të valuar një lugë gjelle me gjethe të freskëta ose të thata, ose edhe një bustinë çaji.

Lulja e portokallit

Ngjashëm me verbenën e limonit, lulja e portokallit ka efekt qetësues, antispazmodik, pra ndihmon në relaksimin e muskujve të mureve të organeve të brendshme, dhe kundër të përzierave. Ajo gjithashtu nxit një tretje më të ngadaltë. Për fat të mirë, është natyralisht pa kafeinë, çka e bën ideale për t’u pirë në mbrëmje. Shto një çerek luge çaji në filxhan.

Kopra

Kopra është bima karminative par excellence, ideale për fryrjen e vazhdueshme dhe ndjesinë e rëndesës. Lër një lugë gjelle fara kopre, të shtypura lehtë, në ujë të valuar.

Lëre pijen të ftohet pak dhe pije ngadalë.

Doktoresha Cotinat rekomandon edhe disa bimë të tjera që kanë treguar efekt pozitiv në mikrobiotën e zorrëve: rrënjën e marshmallow-t, falë mukilazhit të saj mbrojtës; shafranin e Indisë, për përfitimet anti-inflamatore dhe efektin rregullues mbi mikrobiotën; si edhe xhenxhefilin, që ka veti anti-inflamatore, antioksiduese dhe kundër të përzierave. Edhe likuiricia, falë vetive anti-inflamatore dhe antimikrobiale, mund të jetë e dobishme. Po ashtu edhe menteja, por ajo është më mirë të konsumohet gjatë ditës.